اندھیرے دور کرے نور سے اجالے مجھے
کوئی تو ہو جو ترے بعد بھی سنبھالے مجھے
میں مر رہا ہوں مگر سانس دے رہے ہیں بہم
تمہاری ذات سے منسوب کچھ حوالے مجھے
یہ رود خواب نہیں مخمصے کا دریا ہے
ڈبوئے عشق کبھی جوش میں اچھالے مجھے
ابھی میں ریل کی پٹری سے دور بیٹھا ہوں
ابھی ہے وقت اگر ہو سکے منا لے مجھے
نہیں ہے یاد مجھے نام ہاں مگر آنکھیں
شراب بھول چکا یاد ہیں پیالے مجھے
میں سونپ دوں اسے انعام میں بچی سانسیں
مرے وجود کے ملبے سے جو نکالے مجھے
نشان میل کی رنگینیوں کے صدقے ہوئے
بہت عزیز ہیں پاؤں کے سارے چھالے مجھے
آزاد حسین آزاد
رکن ، منڈی بہاءالدین