مقیم حجرۂِ جاں میں خیال ہو جائے
کسی طرح سے تو جاناں وصال ہو جائے
کیا ہے کس لئے خلقِ خدا نے یوں مصلوب
خدا کے سامنے یہ بھی سوال ہو جائے
میں اس گمان میں رہتا ہوں وہ نہ آئے گا
اگر وہ ملنے کو آئے کمال ہو جائے
ہے جیسا حُسن ہو ایسا ہی خُلق بھی اس کا
تو آپ اپنی ہی اک دن مثال ہو جائے
سدا کھلا رہے گلشن میں پھول چاہت کا
کسی کا حسن نہ روبہ زوال ہو جائے
اگرچہ لطف تو گھاؤ بھی دے رہے ہیں مگر
میں چاہتا ہوں کہ اب اندمال ہو جائے
جو شخص صبر کی تعلیم دیتا ہو زاہد
اسی کا ضبط اگر پائمال ہو جائے
حکیم محبوب زاہد
