مجنوں نوں وچہ قبر فرشتے آپچھیا جد بھائی
کون تیرا رب کسدائیں بندہ کی ہے عمل کمائی
مجنوں کفن اٹھایا سر توں جاتا لیلاں آئی
قدم فرشتے دے پھڑ چمدا اُچی کرے دُہائی
کہیا فرشتے او دیوانے میں پچھیا رب تیرا
توں کیوں لیلاں لیلاں کرکے پانویں شور اچیرا
مجنوں آکھے قسم لیلاں دی نہیں پچھاتا کائی
میں جاتا اج قبرے اندر میری لیلاں آئی
کہیا فرشتے کون تیرا رب حکم پچھن دا مینوں
مجنوں کہہ جاہ در صاحب دے اوہ دسے سچ تینوں
جے میں آکھاں تیرے تائیں میں ہاں اوہدا بندہ
اوہ منظور کرے نہ اگوں حال ہووے پھر مندا
میں ہاں جسدا بندہ بھائی اس تھیں پچھیں جا کے
میں ہاں جھوٹھا اوہ سچا دسے سچ فرما کے
جے اس کہیا تیرے تائیں مجنوں بندہ میرا
میں اوہدا اوہ میرا دائم کی اتھے کم تیرا
پنجابی صوفیانہ کلام